Circulus Latinus Bruxellensis sub auspiciis sodalitatis Melissae necnon fundationis «Humanitas Europae» Bruxellis congregari solet secundo quoque mense, moderante Gaio Licoppe, ad Latinitatem iucunde exercendam.


Saturni die 2 m. Septembris a. 2017


Cum tam infrequens fuisset sessio mensis Aprilis, intra quattuor insequentes menses  nullam habuimus sessionem.

Postea, cum invitatione circummisi epistulam monitoriam ad circiter 25 homines, qui sessionibus plus minusve regulariter interesse solent, qua dicebam, si vix adhuc superessent qui participare vellent, tempus esse de fine circuli statuendi. Sed o miraculum! Duodeviginti fuerunt participes ad quattuor civitates pertinentes, inter quos etiam complures iuniores.

Ut fieri solet in nostris coetibus cum adsunt novi participes, a singulis per gyrum petitum est ut se commendarent et aliquid dicerent de studio suo linguae Latinae.

Inter nuntios actum est de epistula accepta ex urbe Cairo, ubi floret institutio linguae Latinae, et de Feriis Latinis Ferigoletensibus hoc anno non habitis propter moderatricis improsperam valetudinem. Earum loco aliud inceptum proponebatur, in quo nuntiabatur acroasis de humanae societatis Europaeae discrimine deque remediis proponendis. Cum legissem oratorem suadere ut cives se a comitiis abstinerent, participes de hac re palam interrogavi.

Cum interessent homines e quattuor civitatibus oriundi, primum comperimus non ubique easdem esse leges de suffragiis dandis. Nonnulli in circulo nostro dixerunt obligationem hac in re non esse optandam. Tunc in memoriam revocata sunt longa certamina Occidentalium, ut democraticum suffragium institueretur; hoc imprimis solis viris reservatum est et diu feminae idem ius exspectaverunt. Quare, si praedictam acroasin audivissem, certe respondissem haec: «Quale consilium inacceptabile! Vivimus in Republica, etiam si in Belgica et nonnullis aliis civitatibus ornatur Rege, qui tantum civitatem repraesentat, non regit. Si historiae decursum percurrimus, patet solum hoc regimen libertatem singulorum civium tueri et iustitiam omnibus offerre posse. Certe Respublica non caret vitiis atque iam ab eius ortu in antiqua Graecia non defuerunt effectus mali. Experientia tamen vitia corrigi possunt. In hunc scopum nihil prodest se a comitiis abstinere; magis utile est candidatum fidum eligere, qui nihil impossibile promittat, sed potius nuntiet conamina necessaria ad frugiferos effectus adipiscendos. Civis Reipublicae, qui se a comitiis abstinet, dignus est qui civitate privetur. Libertatis beneficia imponunt quoque officia. In Belgica comitia participare est omnibus lege obligatorium.»

De futuro circuli nostri etiam erat disputandum. Primum sententiam patefeci eorum, qui eam nobis per epistulam dederant. Inter quos optimus Latinista, qui iucundas symbolas in Melissa olim divulgavit sed iam diu sessionibus non interest, scribit ad summam haec: mores esse mutatos, televisionem et interrete magnum spatium occupare; multos hodie esse circulos Latinos in orbe terrarum, numerum tamen participum perraro quinque sexve superare. Alius epistulae scriptor iam primam circuli sessionem anno 1983 habitam participavit et assidue sessionibus interfuit usque ad recentiora tempora, quibus statuit iam non venire. Putat enim pulchram rem fuisse motum Latinitatis vivae, sed hoc tempus esse transactum.

His lectis licuit singulis sententiam suam dare. Unus iunior, sed iam academicus, dixit numquam tot fuisse circulos Latinos in orbe terrarum; falso ergo dici usum linguae Latinae iam non esse attractivum. Nemo inter praesentes finem circuli Bruxellensis proposuit. Tunc de modo rei in futurum ordinandae erat statuendum. Quod pertinet ad sessionum frequentia, senae sessiones in anno plerisque placent. Distributio rerum agendarum non videtur esse mutanda. De argumento disputationis longius tractavimus; nonnulli dixerunt sibi satis temporis non esse ad argumenti disputationem parandam; optant ut in fine sessionis et dies proximae sessionis et argumentum nuntietur. Cum dicerem me saepissime a sodalibus petivisse ut aliquod argumentum proponerent, sed frustra, statutum est ut aliquis e participibus argumentum insequentis sessionis inveniret, quod ipse in sessione defenderet. Lucas tunc dixit se paratum esse ad hoc proxima occasione suscipiendum; eius propositum a participum corona acceptum est.

Post hanc longam disputationem vix supererat semihora, qua nonnullas Titini libri De Thesauro Rackhami Rubri imagines spectaremus et solito more tractaremus.


Septem nostrum proximam cauponam petiverunt, ubi iucunde perrexerunt Latine sermocinari.


Proxima sessio fiet Saturni die 21 m. Octobris. Interea optime valete!