Circulus Latinus Bruxellensis sub auspiciis sodalitatis Melissae necnon fundationis «Humanitas Europae» Bruxellis congregari solet secundo quoque mense, moderante Gaio Licoppe, ad Latinitatem iucunde exercendam.
Saturni die 5 m. Aprilis a. 2025
Iterum frequens et iucunda fuit haec sessio Latina. Disputationis argumentum a Christiano propositum erat ‘de intellegentia artificiali’. De qua singuli participes invitati erant ut sive experimentum facerent sive sententiam promerent sive interrogationes proponerent. Viva fuerunt colloquia de hac quaestione vere hodierna.
Sumpta pausa cafearia, Titini fabulam, ut solemus, in Latinum vertimus; agitur nunc de fabula c.t. ‘De templo Solis’. Postea textum una legimus, qui hic infra ostenditur.
Denique nonnulli nostrum una iucunde, necnon Latine, cenaverunt.
Proxima circuli Bruxellensis sessio fiet die 7 m. Iunii. Interea optime valete!
Genovefa Métais, Saeculorum transvectio, Leichlingae, Domus editoria Rainardi Brune, 1976, p. 9-10
«Reviviscetne homo?» «Operarios, qui puteum foderent, insolens aliquid invenisse ab notario nostro Ostiae locato nuperrime accepimus. Corpus enim humanum pulchra specie, quod tamen multa abhinc saecula sepultum esset, ibi patefactum est. Cuius in sinu charta posita erat, in qua haec diligenter scripta legi poterant: ‘Viator, si me umquam reppereris, L. Apuleium Afrum L. Apuleii Madaurensis libertum me esse scito. Patronus meus, qui in Aegytiorum magorum artes magnum studium multamque operam contulit, me non invitum, antequam fato cederem, refrigeratione servari et unguentis condiri iussit, cum posteris saeculis doctos homines fore speraremus qui me ad vitam revocare scirent. Quamquam igitur iam in peculio Proserpinae et Orci familia numeratus sum, beneficio tuo me alteram vitam victurum esse credo. En ecce pristinis aerumnis absolutus, ut olim patronus per Isidis magnae providentiam, sic iam ego per hominum doctorum scientiam de mea fortuna triumphabo. Gratias tibi immaturas pro auxilio ago. Vale et fac valeam!’ Ut ipsi aliquid novi didicerimus, sic vos certiores faciemus quid ex ea re consecutum sit.»
Haec in prima clarissimae Romanorum ephemeridis pagina tradita, haec in omnibus ephemeridibus omnium urbium in omnibus terris transcripta sunt, haec radiophonice omnibus undis iam transmissa, televisione relata erant. Homines omnes omnibus in terris haec curiose legunt, studiose audiunt, vehementer mirantur, diligenter in colloquiis agitant. Tabernis, ubi acta diurna multitudini proponuntur et libelli veneunt, turba aestuans circumfunditur, cum nemo sit qui tanta re non moveatur. Mulierum, virorum, senum, adulescentium nemo, ne puerorum quidem ullus domi manere vult, cum inventum tam insolens tamque incredibile nuntiatum sit. Quin etiam! Sunt qui, cum maxima sciendi cupiditate compellantur, autoraeda vel tramine vel aeroplano vecti Ostiam petant... frustra quidem: nam postero die mane in ephemeridibus nuntiatur corpus clam ablatum et aeroplano proprio Neo-Eboracum vectum esse ut a peritissimo quoque medico (seviros quidam illos nominant cum sit Italus et Americanus et Russus et Gallus et Britannus et Germanus) exploraretur.
Omnia inde tam secreto geruntur ut actorum diurnorum scriptores nihil audire possint quod multitudini tradant. Hoc solum compertum est, medicos conventu habito sententiam nullam dicere voluisse, voluntates et curas suas copulare. Hoc vero incommodum ephemeridum rectoribus videtur, quod populus nova semper cupit poscitque, quae si ei non oblata erunt, ab actis diurnis legendis se avertet. Itaque officiales urgent ut aliquid novi de illo corpore scribant. At ii quomodo et moderatoribus et lectoribus morem gerant nesciunt, cum a praesidiis ab omnibus urbis valetudinariis ita arceantur ut ne certum quidem sit quo in valetudinario seviri cum corpore sint.
Quae cum ita sint, alius alia ratione utitur ut, cum omnia ignoret, nonnihil tamen scire videatur. (...)
Sic per aliquot dies suspensorum lectorum exspectatio producitur. Decimo tandem die, cum levis variaque multitudo alias mirationis causas iam quaerat, ecce subito per televisionem palam renuntiatur omnia feliciter successisse et L. Apuleium Afrum recreatum rursus spirare.